BILANGGUAN
By : Christopher Balneg, 21 yrs.
La Union Provincial Jail
Mataas na bakod, kalawanging rehas
Pader na makapal, wari’y di matinag
Tanod de armas, sa lahat nakamatyag
Handang pumatay sa magtangkang kumalas.
Kayrami nang pangarap ang nilagay sa bartolina
Sa dilim at init halos di makahinga
OO nga’t kahit papaano’y nakakakain pa
Nguni’t kinabukasan at dangal ay halos mailibing na.
Hapdi ng kawalan ay lumalaganap
Sugat na idinulot ay di lang sa balat
Sa pagkatao ng masa’y walang habas ang pagyurak
Ng mga sakim na may-sala sa ating pagkakabihag.
Lipunang ginagalawan ay malaking bilangguan
Mataas na bakal ang pagitan ng mahirap at mayaman
Kalawanging batas ang nagsisilbing rehas
Hadlang sa pag-ahon sa kahirapang dinaranas.
Mamamayang bilanggo ng hirap at dusta
Apoy ng himagsikan
Pag-aalabin pa
Gupuin ang tanod ng pagsasamantala
Palayain lahat ng nagdurusa.
Bilangguang kinagisnan ay maglalaho din
Buong tatag ! Sama-sama !
Rehas ay putulin !
Tangan ang maso
Pader ay gibain
Bukas wala na ang bakod sa lupain.
Bukas wala na ang
Bilangguang mapang-alipin !
0 comments:
Post a Comment